#SOS 20 - اسئلة جنى

بقلم : رانيا سامح برضة .. أم الآنسة المعذبة فى الأرض بسبب التعليم المصرى " جنى "

آية طلبت منى انى اعرف رأيي جنى فى التعليم، وكانت الفكرة بعيدة عنى لان بنتى لسه خبرتها قليلة قوى لانها لسه حتروح تانية ابتدائي، بس قررت اعملها استجواب وكنت حاسة انى عاملةو زى وكيل النيابة بالظبط....... ومع ذلك حسيت ان وجهة نظرها حتى لو كانت قاصرة على اهتمامات بسيطة لازم نحترمها ونحطها في اعتبارنا........ شكراً يا آية.

جنى بنتي عندها 7 سنين بمعنى اصح كملت ال7 سنين النهاردة، مكنتش اتخيل ابداً ان اطفال في اولى ابتدائي ياخدوا كم الكتب ده اللي تقريبا كنا بناخد محتواه في اعدادي وخاصة في الانجليزي والحساب، جنى ولو انها لسه مش قادرة تستوعب انها ليه بتروح المدرسة وايه الهدف منها اصلاً انه يبقى في امتحان في الاخر ودي طبعا بتكون اجابتى بعد خناقة طويلة عريضة من انها لازم تعمل الواجب وتذاكر، فطبيعي لما تقول ان اكتر حاجة بتحبها في المدرسة هي حصص الالعاب والفسحة، اللي طبعاً سيرتهم كانت بتنط من غير مناسبة في اى سؤال تانى بسأله
جنى مش عاجبها ان في حصة الالعاب مدرستهم تمنعهم من الخروج للملعب من غير سبب وبتعتبر ده ظلم ليها ولاصحابها " ازاي يعني ميلعبوش"... وكمان حرمانهم من حصص الانشطة اللي بيستخدموا فيها اديهم وادوات كتيرة بتحبها واللي ممكن تخرج طاقة وموهبة ابداع عندهم جبارة "انا فرحانة قوى ان جنى بتزعل على ضياع حصة النشاط"
للأسف جنى بتحب تكرار الدروس او كتابتها وده مخليها بتحب حصة العربي عن الحساب لان وعلى حسب تعبيرها "مفيهاش تفكير".... مش عارفة دى ميول ولا اسلوب تعامل من المدرسين ولا تقصير منى........
وامنيتها الكبيرة طبعاً انها متكتبش واجب كتير وبتسأل ليه منكتبش الواجب على الكمبيوتر ونذاكر عليه....... اعتقد انها لو اتطبقت ممكن الولاد ميحسوش بملل الواجب ده ولا المذاكرة اللى قايمة على الكتابة والحفظ  وحيحبوها طبعاً، وبتزعل قوي لما المدرسة بتاخد الكراسات منهم وتكتبلهم الواجب حيكون ايه وخاصة لما تلاقيه كذا صفحة.. انا عن نفسي بعتبره اهدار للوقت الواجب ده..
وبالرغم من حبها للكمبيوتر والموسيقى الا انهم مش بيستفيدوا حاجة منهم، الاجهزة موجودة لكن المدرسة حاطة نظام غريب واضح كدها انها عندها تعليمات ان مش كل الاجهزة تتفتح فاخترعت ترابيزة العقاب ، وليه عقاب انا معرفش بس اهى حجة والسلام علشان كام واحد بس اللي يشغل على الاجهزة وتقريباً بتبقى حصة فرجة على كارتون زيها زى الموسيقى اللي قليل قوى انهم يعزفوا فيها على الالات.

جنى شايفة ان احسن تاخد كتبها وكراساتها معاها كل يوم ومبررها ان "مفيش مكان نحط فيهم الكتب فى المدرسة ومنشيلهمش كل يوم"... والشنطة طبعاً مشكلة كل جيل
جنى شايفة انها بتتعلم بس علشان لما تطلع دكتورة تعرف تكتب العلاج للناس وطبعاً اكدت انها عايزة توصل لده بس من غير واجب كتييييييير

جنى بتحب الطابور جدا وبتحب تحية العلم قوي وصحيح هى بتحب تمارين الطابور لكن نفسها ميطولوش مدتها علشان بتتعب او على الاقل في الصيف يغطوا الملعب بمظلات من فوق علشان الشمس .... والله عندها حق هما بيعذبوهم كده ليه...

اخر حاجة جنى نفسها فيها ان "فيها ايه يعنى لو الامتحان كان سؤال واحد او اتنين بس"

يعني لو التعليم على مستوى كويس اكيد بسؤال او اتنين نقدر نقيم مستوى طالب لان اكيد الكتب مش حتكون للحفظ وبس حتكون قايمة على الفهم وتشغيل الدماغ

طبعاً كلام جنى معظمه ملوش دعوة بالتعليم لكن لازم نعتبر ان البيئة اللي بيكون فيها الطالب نص اليوم تكون من اولى اهتماماتنا علشان نديله التعليم الصح، يعنى المدرسة لازم تكون مكان ممتع للطالب مش اجبار عليه انه يروحها غصب عنه كل يوم، مكان بيستمتع فيه وبيقضي وقت مفيد، مكان ميحسش فيه بالتعب والارهاق فبالتالي يكمل اليوم صح، نقدر بعد كده بأي وسيلة نوصلهم التعليم وساعتها حيكونوا مستعدين لاستقباله، فنلاقي نتيجة سليمة
اسئلة كتيرة سألتها جنى ومحتاجة اجابات:
- ليه بنروح المدرسة؟
- ليه العقاب بس في حصة الالعاب والانشطة مش في حصص تانية؟
- ليه مفيش مكان نحط فيه الشنطة والكتب؟

- ليه الامتحان اسئلة كتيرة قوى مش واحد ولا اتنين؟

لو فضل التعليم في بلادنا على حاله، أكيد جنى حتعرف اجابة الاسئلة دى واسئلة تانية حتسألها كل سنة وهى بتستلم شهادة التخرج من الجامعة اللي ما اخترتش تدخلها.